Happy Birth Day....

අටවෙනි මාසෙ විසිහත් වෙනිදට යෙදුන
මේ ලොව එළිය මුල් වර ඔබ නෙත ගැටුන
දිනයයි අපේ නැන්දම්මා හිනා ‍උන
මා වෙනුවෙන්ම ඔබ මෙලොවට තිළිණ වුන

කියුටෙක්ස් ඇඳුම් සැන් පවුඩර් වලට වඩා
මගෙ කවි ඔබට රසවත් බව නිතර දොඩා
තිබෙනා නිසා ඔබ ගැන කවි කැකුළු කඩා
අමුණමි මදක් අමතක කොට සියළු විඩා

සුව විඳ පුංචි මාලිගයේ අපට සැදූ
දරු දෙදෙනෙකුගෙ සුරතල් මා වෙතට පිදූ
අප හැම දෙනට පෙම්වත් බව නිතර බෙදූ
වේවා සුභ උපන්දිනයක් ඔබට සුදූ.......

ඒක් පූල් දෝ මලික්.......

යන්තම් තුරුණු විය දකිනා ඒ කාලේ
දැහැමෙන් සෙමෙන් මම හිටියා ඉස්කෝලේ
හදිසියෙ මතක සිතිවිලි නැග ආ වේලේ
ලියනෙමි යළිත් සිහිවෙන්නට මා බාලේ

විදු පියසට පැමිණි ගන්නට සකල කලා
කවුරුත් හැඳින් වුවෙ ඈ ලෙස නෙරංජලා
බැලු විට කෙනෙක් දෙස යන්තම් හිනා වෙලා
යන බව නිසැකමයි හදවත් සලිත වෙලා

හැටියට මතක හිටියේ නව වැනි වසරේ
රුව ගුණ වරුණ ගැන පාසැල තුළ පැතිරේ
ඇය ගැන සිතුම් සැම හදවත් වල ඉතිරේ
කොල්ලන් සිහිනෙනුත් පැතුවා ඇගෙ කතිරේ

ගෙනැවිත් ඇයට ටොපි චොකලට් අඹ රඹුටන්
නාරං හිඹුටු දං හා ලැබුණොත් සිදරං
නිතරම දුන්න හින්දා සෙනෙහස සමගින්
ඇගෙ සිත සැනසුවා විටකදි තරිඳු ලඟින්

දින සති මාස මේ විලසට ගත වෙද්දී
මේ පෙම් පැළය හෙමි හෙමිහිට දළු ලද්දී
නිතරම අහන්නට වෙයි මේ වැනි සිද්දී
ඇගෙ සිත තවත් අතකට යනවා පැද්දී

සිත අග පිපුණ මල නෙලනට සැමට හොරා
බොහො දෙන දත කෑව දින සති මාසපුරා
එනමුදු එසිත ගෙනයන්නට මලිඳු කරා
ඉසුරුට හැකි වුණා පෙම් නිම් වළලු ඉරා

විටකදි ඈ මටත් සිනහාවක් පෑවා
හදවත කොණක යන්තම් කිතියක් ආවා
අද මෙන් එදත් මට බැරි හින්දා ඕවා
මට නම් එපා අපි ඕවට නෑ කීවා

එක හට්ටියක් හැඳි දෙකකින් කන බවට
සාධක සමග තොරතුරු ලැබුණත් එමට
ඒ බව නො‍තේරුණෙ පූරුවෙ කළ පවට
මෙය උපහැරණයකි ආලය අඳ බවට

මේ ලෙස මාස තුන හතරක් ගෙවිල ගියා
පෙම් කවි සඳැස් ලිපි එතෙරින් මෙතෙර ගියා
හදිසියෙ රංඩුවක දසුනක් නෙතෙහි තියා
දිවුවා එදෙස වනපොත් හැම පසෙක තියා

තුන්වන ලෝක යුද්ධය ඇරඹුන විලසේ
කොල්ලන් දෙදෙන ගුටි ඇණ ගන්නට සැරසේ
දෙන්නට ලැබුන ලියුමක් අත්වල දිලිසේ
හේතුව විමසමින මම එතනට පිවිසේ

ඒ මල මගෙයි !!!! පවසන විට ඉසුරු තුටින්
හිමිකරු මමයි පිටවුනි අනෙකාගෙ කටින්
වලියට පෝර එයි ටික ටික වටින් පිටින්
නවතා ගන්න පිහිටක් නම් නැත අවටින්

ලියුමේ යටිපැත්තෙ ඇඳ ඇති පුංචි මලේ
තිබුණේ අඩකි , ඉතිරිය ඇත අනිත් කොලේ
මගෙ දෑසටම මේ සිද්ධිය දැකපු වෙලේ
පැන්නා මැදට ඉවසාගෙන අසන් මලේ

ගුටි ඇණගන්න පෙර පොඩ්ඩක් බලල හිටින්
සිද්ධිය පෙනේ ඔය ලියුමේ අකුරු යටින්
එකවර ලියුම් දෙක ලියලා හිතේ තුටින්
උඹලට කවා ඇත තණකොල ගෝනි පිටින්

එකම කොලය අරගෙන ඉරලා දෙකට
ආදර හසුන ලියලා දෙන්නට එකට
සැන් පොඩ්ඩකුත් ඉහලා සුවඳට යසට
ගැස්සුනි වැඩේ !!! දෙන්නට බැරි වුණි තිතට

ලිපි දෙක මාරු වී ඇත දෙන්නට දුන්න
හේතුව මෙයයි දෙන්නා ගුටි ඇණ ගන්න
මල්ලිට , ලියුම් ගෙනියපු නොම වරදින්න
සිද්ධිය තවත් තිබුණා බොහො දුර යන්න

බොහො දෙන තීව මුත් මේ ගැන මගේ කණේ
මගෙ කරුමයට පිළිගන්නට නොහැකි වුණේ
ඇත්තට දැනුයි මගෙ ඇස්දෙක විවර වුණේ
තරහා නොවෙන් මගෙ මිතුරේ මගේ පණේ

දැන් නම් මචං දෙන්නම එක බෝට්ටුවේ
හොර පෙම් පුවත් කවදා හෝ මාට්ටුවේ
පාසැල් පෙම නිමා විය තුන් කාට්ටුවේ
දුර දිග ගියා නම් දත කට පූට්ටුවේ

මෝරපු නමුත් ලඳ බොලඳයි කොයි වේලෙත්
කෙල්ලන් අද මෙන්ම චපලයි ඒ කාලෙත්
අත් විඳ තිබේ මේ වැනි දේ මා බාලෙත්
පාරෙදි මගදි පමණකි නොව ඉස්කෝලෙත්